Horche ma droff, nuh kommd was ganz Eisiges. Mor solls ni gloobn, aber es is schon widder warm. Der Schnee daud vor sich hin. Das war ma ä Indermezzo, wie das Weiß in den Gassen lag. Mor bekam das Gefühl von Winder. Ich habs genossen.
Ich bin midn Schiern nach Ullersdorf und dorde übern Golfbladz gerudschd. Das war enne Lägge. Rischdsch schön bin ich durch dä Sonne gefahrn, hab mich mid dä Leude underhaldn. Warn ja viele da. Mor frachd sich, wer eechendlich noch arbeedn gehd.
Dann war ich offn Hirsch. Da binsch midn Schliddschuhn los. Un off ehma kam da lauder Eishockeyschbieler. Dä aldn Herrn ham dorde gekämbfd um den Buck. Und soll ich euch was sachn: Dor Dhillich, was dor oberschde Saggse is, der had zugeguggd. Offs Eis is er ni, der wollde ni ins Rudschn komm. Kann mor vorschdehn bei der Glädde.
Ich muss sachn, das war bis hier her ä schöner Winder. Nur dass dor Herr Köddnidz vom Schdraßenbauamd sachd, er kann sowieso ni überall dä Schdraße reene machn vom Schnee, das is ä Offenbarungseid. Aber ich bin schon lange dafür, dass der endlich in Vorruheschdand gehd, obwohl ich gar ni genau weeß, ob der in sei Amd ni längsd da is.
Na, ich will ni schon widder schimfn. Dräsdner schimfn ja angeblich immer so viel. Ja und, ham se ni rechd. Mor darf sich ni alles gefalln lassn. Erschd rechd ni im Winder. Dafür, dass dä Schdraßn vom Schnee befreid wärn, zahln wir doch ooch ordendlich Schdeuern. Guddmachn.
Eure Kudscherin
Hinterlasse jetzt einen Kommentar