Horche ma droff, nuh kommd was ganz Weißes. Ich habs gesehn. Mor solls ni gloobn, aber obn im Fluchhafn in Klodzsche liegd schon Schnee. Än Riesnhaufn ham die da hingemachd. Aber dä Flockn wirbeln wedr draußn, noch komm die vom Himml, sondern aus äm Gondeenr. Ni zu gloobn.
Nuh frach ich mich, warum die dorde än Haufn Schnee brauchn, wos doch sobieso grad Windr wird. Wolln die offm Fluchhafn ne Schneeballschlachd voranschdaldn, damid da endlich ma was los, sprich in dor Lufd is? Wolln die den Schnee hochblasn, damid off dem Airbord ma was fliechd oder was?
Ich hab das ni vorschdandn. Abr damid ich ni dumm schderbn duh, habsch gefrachd.
Da saß kürzlich nämlich so ä Schbordrebordr ausm Fernsehn off meinr Kudsche un der had mir das erklärd. Midde Januar soll am Elbufr dor FIS Schiweldkab schdaddfindn. Un weil ja Schier undndrundr Schnee brauchn, brauchd mor schon ma für alle fälle den Schnee off Vorrahd.
Nuh könnde mor ja annehm, dasses im Januar schneid, aber mid dem Klima rechned wo keener mehr. Drei Dache vor dem Weddkamf wird dä Bisde mid eener 30 Zendimedr hohn Schneedecke bräbarierd. Alleene für ä Weldkab-Renn benödchn die 5 000 Kubikmedr Kunsdschnee. Ni zu gloobn.
Es bleibd also dabei: Alles Gude kommd von obn, denn dä Flockn wärn obn aus Klodzsche mid Lasdrn nundr ans Elbufr gekarrd.
Ich weeß ja ni, ob das für dä Umweld gudd is. Wenn kee Schnee liechd, dann müssn dä Schbordlr ebn renn. Aber nee, da sachn die wo ab. So sachde es mir dor Schbordrebordr off dor Kudsche. Ni zu gloobn.
Nuh schdelle mor sich ma vor, im Sommr is off dor Elbe ne Weldkab-Regadda. Da wärn die für da Schiffe wo dä Elbe anschdaun und Heizlüfdr für warm Wind offschdelln. Für mich baun die ooch keene Kudschnschbur an dä Audobahn, obwohl ich da gern ma lang fahrn däde.
Nee, nee, so ä Offwand, nur damid es baar schöne Bildr im Fernsehn gibd. Ni zu gloobn. Guddmachn! Eure Kudscherin
Hinterlasse jetzt einen Kommentar