Horche ma droff, nuh kommd was ganz Fahrlässiges. In Löbde is vergangnes Wochenende ä Dieb in ä Geschäfd eingeschdiegn. Das war schon ma ä Fehlr. In dem Ladn had der dann ä Werkzeugkoffr geklaud. Das war dor zweede Fehlr. Dor dridde Fehlr war, dass er sei Bordmonee midn Ausweis midhadde. Und dann kam noch ä ganz dummr Fehlr dardazu. Das Bordmonee had er bei seim Diebeszug in dem Ladn verlorn.
Aber es gibd ja nuh bekanndlich erhliche Findr. In dem Fall war das dä Bolizei. Die ham dem Mann direkd sei Bordmonee midn Ausweis nach Heeme gebrachd. Fünfdr Fehlr vom Dieb. Den geklaudn Werkzeugkoffr hadde der in seinr Bude schdehn. Dä Bolizei konnde in dem Fall eens un eens zusamm zähln und had den Dädr übrführd. Der had nuh sei Bormonee wiedr, abr ooch ne Menge Ärger. Ich sache immr: Wenn mor dumm geborn wird, da kann mor nischd dafür, abr wenn mor blöde bleibd, dann muss mor schon ganz schön behämmrd sein. Guddmachn.
Eure Kudscherin
Hinterlasse jetzt einen Kommentar