Aktuelle Kolumne: Die Kutscherin aus der DAWO! – Horch, was kommd von draußn

Horche ma droff, nuh kommd was ganz Neues. Ich bin, ich sags offn raus, umgesaddeld. Ich fahre zurzeid ni mid meenr Kudsche rum, sondern mid so ä Kleendransbordr. So ne Liefrfirma had mich angeschbochn, denn es fehld an Fahrern, ooch -innen. Die ganzn Bakede bis Weihnachdn müssn ja naus.

Un so drehe ich mid ä Miedwagen jedn Dag meine Rundn durch dä Schdadd. Es is schon ä Ding, wie viele Geschenke dä Dräsdner online beschdelln. Abr was solln se ooch machn, wenn dä Geschäfde zu ham. Die Woche habsch vor ä Miedshaus mid vier andern Auslieferfahrzeugn geschdandn. Jädze weeß ich ooch, wo das Lied herkommd: „Horch, was kommd von draußn rein“. Das war enne Ard Geschenkeschdau vorm Eingang. Wenn keenr mehr nausgehn kann, dann muss mor ja das Zeug hinbring. Kann sein, dass das dä Zukunfd is. Ho, ho, ho. Schön 4. Advend.

EURE KUDSCHERIN