Aktuelle Kolumne: Audo-Kino is dor Hid

Kutscherin aus der DAWO!
Grafik: DDV Kreation

Horche ma droff, nuh kommd was ganz Ramdössches. Nu klar, ich wär langsam kirre. Dabei findsch dä Idee gudd, dass mor wiedr Audokino machn will. Dä Vorwaldung had das abr glei ma abgeblockd. In dor Fludrinne odr am Fluchhafn sollde ne Leinwand offgeschdelld wärn, doch noch is es ni erlobd. Abr warum dänne? Das is doch nuh wärklich Corona-fähig. Jedr sidzd in seinr Karre, hörd sich übrs Audoradio dän Don an und kann vorne guggn, was für ä Film läufd. Ich weeß noch, wie ich als junges Mädl mid mei erschdn Freund im geborchnd Warddi dor Eldrn in so ä Kino war. Mit ham dä „Siebn Sommrschbrossn“ midn Fränki geguckd. Das war an dor Osdsee. Und jädze kommds: Beim Abschbann da had der mich geküssd.

Na, vielleichd sachd de Schadd ja deshalb, dass es kee Corona-Kino gebn darf, weil sich da dä Leude wiedr nähr komm. Abr es is doch ni auszuhaldn, dass mir alle in dor Brohibidion sin. Ich will wiedr raus aus mei Schdall. Un ooch meene Ferde, die scharrn mid dä Hufe. Ich hädde gar ni gedachd, dass die das Flasdr von Dräsdn so vormissn. Ich will wiedr dä Gäsde kudschiern un dän erzähln, wie schön es hier is.

Nuh machn zwar dä erschdn Lädn wiedr off, abr das kanns doch noch ni sein. Immr nur im Gardn rumhäng, dass dreibd mich in Wahnsinn. Un ooch mei Mann, der had jädze angefang mid Gymnasdik. Wissn Se, wie lächerlich das aussiehd. Der machd sich vor dä Ferde zum Affn. Also ich hoffe, dass dor Blan offgehd und ich bald ins Audo-Kino fahrn kann. Da sehn mir uns dann, winkn uns durch dä Fensdr zu. Bleibd gesund!

EURE KUDSCHERIN

Hinterlasse jetzt einen Kommentar

Kommentar hinterlassen

E-Mail Adresse wird nicht veröffentlicht.


*


Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.