‘s Fandom dor Brücke

Horche ma droff, nuh kommd was ganz Deures. Ab soford darf mor nachds wieder fufzsch off dor Waldschlößchnbrücke fahrn. Das is doch ma ne Nachrichd. Mir ham’s hier mid dor Erhöhung dor Geschwindigkeed um 20 Kilomedr bro Schdunde durchn Jahreszeidnwechsl zu dun. Und das zum Windor hin, wo Eis un Schnee off dor Brücke liegn könndn. Aber darum gehds gar ni. Es gehd drum, dass dä kleene Hufi Hufeisnnase sich in Windorschlaf vorkrochn had.

Mor kann also über dä Brücke schliddrn, kee Broblem, bloß ni in dor Sommernachd gegn so ne Fledermaus rasn, die sowieso ni da is: das Fandom dor Brücke. Das wär ma ne echde Ober in dor Sembrober.

Dabei schdraln de Geländer in dor Nachd dachhell. Lichd, Lichd, Lichd, wo mor hinguckd. Es is dorde gar keene Nachd, es is nur dä deuersde Dembo-30-Zone dor Weld. Bis zum fierdn Jubiläum im Augusd diesn Jahres hamse ganze 75 000 Krafdfahrer geblidzd: 2,3 Million Euro Bußgeld. Da had de Schdadd in baar Jahrn das Geld fürn Bau dor Brücke dadsächlich wiedr rein.

Un weil das so schön klabbd midm Bußgeld, darf mor zwar fuffzsch off dor Brücke fahrn, aber ni mehr dahindor. Nee, vorm Aldersheim und dem Herzzendrum gild ab soford dreißsch! Denn da sin ja alde Leude und ooch Kranke.

Ich frach mich nur, ob die Dembo-30-Zone nuh nur im Windor gild. So kann dä Schadd nuh an der Schdelle blidzn un Geld einnehm. Ich schlache vor, ooch an dor Carolabrücke und am Blaun Wunder zu jeder Jahreszeid ne andre Geschwindigkeed vorzuschreibn, da klingelds so rischdsch in dor Schaddkasse. Eure Kudscherin

Wo drückd dor Schuh? Schreibn Se mir einfach äne Mehl an: [email protected]

Hinterlasse jetzt einen Kommentar

Kommentar hinterlassen

E-Mail Adresse wird nicht veröffentlicht.


*


Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.