Horche ma droff, nuh kommd was ganz Feierliches. Dor Augusd, was dor Schdarke is, der had nächsde Woche (12.5.) Geburdsdach. 350 Jahre ald wird dor Geenisch von Sachsn. Nu, da gradulier ich ooch ma. Am besdn machd mor das, wenn mor ins Schloss gehd, denn jädze darf mor ja wiedr dorde hin.
Als ich kurz nach dor Eröffnung vorgangnes Jahr da war, bin ich allerdings ganz schön erschrockn. Ni nur, dass ich mir dä siebn Gewändr vom Monarch angeguckd hab, nee, dor oborschde Adel war ooch bersönlich da. Ich hab mich vor dän geschdelld, abr der had ni Muh und ni Mäff gesachd. Dor Kennr schweigd und genieß, habsch gedachd.
Erschn nach nor Weile habsch midbekomm, dass das ne Bubbe war. So wie dä Boln ihn zum König gemachd ham, so schdehd der gekrönd da. Dä Krone, die der offhad, is von dä Boln, ne sächsche Krone gibds bis heude ni. So was erfähdr mor im Schloss. Als ich den Mann so schdehn sah, da wurde mir klar, dass ders ooch ni grade leichd hadde mid den ganzn Zeuch am Leib. Das muss doch schwer gewesn sein. Er selbsd wars übrigens ooch. Dor Obersachse hadde enne fedde Diabedis. Die had den ganz schön beherrschd. Also Sießes wird dem Augusd ni geschenkd. Beibd alle schön gesund!
EURE KUDSCHERIN
Hinterlasse jetzt einen Kommentar