Horchd ma droff, nuh kommd was ganz Dreggsches. Warn Se in vergangnen Dachn ma off dor Augusdusbrügge? Nee, warn Se ni. Nu da ham Se was vorbassd. Off dor schönsdn Brügge von Dräsdn lieschd in Eckn Dreck, da sin dä Aussichdsbunkde geschberrd und hindor dän Zäun schdabeld sich dor Misd. Das siehd aus wie bein Hoddndoddn.
Wobei mor ja inzwischn sachn muss, dass es bein Hoddndoddn ofd besser aussied als an manchn Schdelln in Dräsdn. Ich kann das eefach ni fassn, wie das Radhaus äne Brügge, wo dä meisdn Dourisdn drieborladschn so vorkomm lassn kann. Das is keene Ard und Weise, sondern ä Reimword…
Seid Jahrn faseln die dadrieber, ob dä Brügge vom Vorkehr frei sein soll. Ja, nu klar. Das is dä Schlendermeile vom Schloss in dä Neuschdadd. Da gehörn Musikandn droff. Da schdörn die ooch keen. Da gehörn Maler droff, die dä Leude vorm Ganaleddo-Bligg zeichnen. Da kann ich dann ooch midmei Kollegen mid dor Kudsche drieberfahrn und ma haldn, ohne dass mich eener anhubd, weil ich zu langsam bin.
Dä Augusdus-Brücke muss soford in Ordnung gebrachd wärn. Aber jädze isses keene Ard und Weise, sondern ää Dreckfleck sondershausen. Ich vorschdeh eefach ni, mid was für Ignorandn man in dor Schdadd zu dun had. Dass so nä Brücke so vorlodderd, das is mid äm ordendlichen Bürschermeesder ni drin. So lange da alles lawede is, is das für mich dä Hilberd-Brügge: Lodderwirdschafd ohne Ende. Guddmachn. Eure Kutscherin
Sie haben spannende Themenvorschläge oder Anmerkungen für die Kutscherin? Dann schreiben Sie ihr einfach eine E-Mail an: kutscherin@dawo-dresden.de.