Horchd ma droff, nuh kommd was ganz Zues. Wenns mich juckd, dann fahr ich ma off dä Höhe. Dä Billnidzer lang, dann links hoch zum Fernsehdurm. Ich mag das Sekdglas, das dorde ausm Granid rauswächsd. Aber, nuh horche droff, der is inzwischn seid fünfnzwanzsch, noch ma in Zahln, seid 25 Jahrn geschlossn.
Früher, da bin ich midm Fahrschduhl hoch, in das Gaffee mid Blick über dä ganze Schdadd. Das war änne Läcke. Ich hab sogar noch än Kuli, der aussiehd wie dor Fernsehdurm. Und der schreibd ooch noch, also dor Kuli.
Dann ham die das Ausfluchsziel dor Dräsdnr und Gäsdeeefach zugemachd, alles rausgeschmissn, dä Bersonfahrschdühle rausgrubbd. Änne Schande is das, dass da keener von uns mehr roff darf.
Zum Glück gibds Dräsdnr, die ni locker lassn und immer wieder droff dräng, dass dor Durm dor Dräsdnr widder offmachd. Ma ä großes DANKE an dä Fraun und Männer von dem Verein:
Es soll jädze änne sogenannde Machbarkeidsschdudie endschdehn, was machbar is um dän Durm widder offzumachn. Ich hoffe sehr, dass das irschendewann klabbn dud. Für dä Schdadd wär das änne rischdsch gudde Addrakdion. Und dä Schdadd hädde endlich ma widder Weidblick, dän se so dringend brauchd. Ich freu mich droff. Guddmachn.
Eure Kutscherin
Sie haben spannende Themenvorschläge oder Anmerkungen für die Kutscherin? Dann schreiben Sie ihr einfach eine E-Mail an: kutscherin@dawo-dresden.de