Ich sache gar nüschd

Nuh horchd ä ma droff, nuh gibds was ganz Geheimes. Es is ja so, dass alle, die sich forschdeckn, ooch was zu forschdeckn ham. Nu freilich. Meine Muddor had immer zu mir gesachd, höre off mid Deiner Geheimniskrämerei.
Ich hab als Göre nie gesachd, was ich grad gemachd hab. Ich blieb eefach schdumm. Und dä Folge vom Schdummsein war: Alle dachdn, ich weeß ewas, was ich ni weeß. So wars ooch. Wenn sich also in Dräsdn die Leude von „Bilderberg“ dreffn und nüschd sachn, dann is das schon müsderiös. Dabei is das ma ganz gudd, wenn ma ni geblabberd wird. Eefach ma dä Fresse haldn, isses Moddo.
Ich hab off meiner Kudsche zwee Männer midgenomm und zum Schloss gefahrn, die ham mir erzähld, dass bei dem Bilderberg-Dreffn im Hodel Gembinskie 130 Fraun und Männer zusammsidzn, aber ni eefach so, sondern in alfabedischer Reihnfolche. In dem een Jahr is „A“ vorn, im andern Jahr ä andrer Buchschdabe. Das klingd schon ma wie das Ridual von nor komschn Gesellschafd. Dor Schäuble is da, dor Demisere, dä von dor Leyen und redn eefach so vor sich hin. Das jedenfalls sachdn die Männer off meiner Kudsche. Ich durfde ooch ni ranfahrn ans Gembinskie, alles verbodn. Über 400 Bolizisdn im Einsadz, um dä hohn Diere zu schüdzn. Nu freilich. Aber es soll nur ä Blaudern sein zwischn neddn Leudn. Das sachdn dä Männer off meiner Kudsche. Wers gloobd….Ich jedenfalls treffe meine Freundinnen nur, wenn ich mid den was zu beschbrechn hab. Und mei Mann erfährd nüschd davon. Sonsd had das doch gar keen Zweck, was mir Fraun uns ausgemachd ham.Mir nenn uns jädze übrigens ooch Bilderberg. Das klingd so schön geheimnisvoll.Welche Frau had ni gerne ä Geheimnis. Ich hab nach dem Fraundreffndann änne Bilzsubbe für mei Mann gekochd und der had gefrachd, woher ich das Rezebd hab. Ich hab gesachd: Ausm Dadord. Da war der ganz schdille. Dabei isses von meiner Freundin. Guddmachn! Eure Kutscherin

Hinterlasse jetzt einen Kommentar

Kommentar verfassen

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.