Horche ma droff, nuh kommd was ganz Schbridziges. Ich hab seid Dagn versuchd, än Dermin für meine alde Muddr im Imfzendrum in dor Messe zu bekomm. Ich bin ja noch ni dran, abr meene alde Dame, die inzwischen knabb neunzsch is, die muss an dä Nadl. Ich hadde mir online enne Regisdriernummr besorgd, dann ber Delefon nach ä Dermin gefragd. Das heeßd, ich wollde fragn. Abr es ging dän Dach übr nischd. Dann habsch von än Bekanndn gehörd, der in Kleenzschachwidz wohnd, dass der än Dermin in Birna gekrischd had. Dann habsch von nor Bekanndn gehörd, dass die 21 Uhr angerufn had un än Dermin in dor Messe gekrischd had.
Also habsch schbäd am Abnd wiedr die Imfnummr gewähld und da ging eenr ran. Ich war glücklich. Un dann, was sollsch sachn, da habsch sogar än Dermin gekrischd. Abr ni in Dräsdn, sondrn in Kamenz. Ich hab soford zugegriffn. Nächsde Woche mach ich also mid meenr Muddr än Ausflug in dä Schdadd vom Lessing und dorde wird se dann offn Flughafn geimfd.
Vorschdehn muss ich das Ganze allrdings ni. Das is schbridznmäßig. Haubdsache ich hab jädze kee Kamenzrn dän Dermin geklaud. Guddmachn!
Eure Kudscherin
Hinterlasse jetzt einen Kommentar