Horche ma droff, nuh kommd was ganz Helles. An dor Baudzner schdehd ä neuer Blidzer glei hindor dor Fußgängerambel. Mich könn die dorde höchsdens ablichdn, weil ich zu langsam bin. Aber dä Audofahrer ham schon ä Broblem, wenn se rasn.
Der neue Schdarkasdn soll jädze digidal fungdschjoniern. Das heeßd, die Bilder gehn glei ins Orndungsamd und dann schnell zum Audofahrer. Ridschradsch wird alles erledischd und mor muss soford zahln.
An Schdelln, wo es gefährlich zugehd, wo Schuln sind zum Beischbiel, Aldersheime oder so was, da finde ich das ja sogar in Ordnung. Ansonsdn halde ich das abor für reine Geldschneiderei. So wie off dor Waldschlößchenbrügge. Da is dor Blidzer enne große kommunale Gelddruckmaschine. Und sonsd nüschd.
Überhaubd wird mor heudzudache im Verkehr viel mehr gegängeld als noch vor Jahrn. Blidzer an jeder Schdelle, Ambeln überall, so als würdn dä Audofahrer ni selber denken, sondern bräuchdn immer än elegdrischn Helfershelfer. Das is echd Klibbschule.
In Wahrheed gehd dem Radhaus nur darum, dä Leude abzukassiern. Sonsd nüschd.
Echendlich lebn mir doch in nor freien Gesellschaft. Doch beim Audofahrn hörd das off. Un beim Diesl erschd rechd. Am Ende gehds ooch hier nur ums Geld, es wird wo bald ne Dieselsteuer komm. Sonsd nüschd.
Bin ich froh, dass ich mid meiner Kudsche in Ruhe fahrn kann. Frieher, wo es nur Kudschn und Fuhrwerge gab, da hieß das Ganze Wegelagerei. Da war‘s ja scho ä Fehler, aus Versehen durch ne Geschend ze kommn, wo dä Leude so arm warn, dass se andre ieberfalln und ausgraubd ham. Die Zeidn sin zum Gligg vorbei, oder? In dem Sinne: Guddmachn. Eure Kudscherin
Wo drückd dor Schuh? Schreibn Se einfach äne Mehl an: [email protected]
Hinterlasse jetzt einen Kommentar