Es ludherd am Elbhang

Horche ma droff, nuh kommd was ganz Brodesdandisches. In dor nächsdn Woche da gibds doch am Elbhang wieder das jährliche Fesd. Un in diesm Jahr da ham dä Organisadorn dä Ludheridis. Es gibd änne Ludher-Show, ä Bubbndheader mid dem Faffn, dor Ablasshandel wird verdond, es schbield enne Ludherlaude. Halleluja!

Nuh muss mor zwee Sachn wissn: Als erschdes is klar, dass mir Dräsdner echde Brodesdandn sin In dem Word schdeckd dor Brodesd, aber ooch dä Dandn. Und als Zweedes is gudd zu wissen, dass ooch dor Dedzl von dor Elbe kam. Ohne dän Dedzl hädde es ja gar kee Ludher gegebn.

Dor Dedzl had nämlich den Ablasshandl ersch ma rischdsch in Gang gebrachd, was den Ludher offgebrachd had. Der konnde dän in Bärne gebornen Dedzl gar ni leidn, weil mor bei dem dä Schdrafe für enne Sünde gegen Geld mindern konnde. Enne feine Sache, damid had der Dedzl viel Geld verdiend. Damid ham die in Rom dän Bedersdom gebaud. Genau genomm ham dä Sachsn den Babsd-Dom finanzierd. Halleluja!

Un all das had dem Ludher ni gebassd und so had der angefang zu brodesdiern. Dä Organisadorn häddn also mindesdens genau so viel Dedzl feiern müssn wie Ludher, aber is ni schlimm. Das Fesd wird drodzdem wieder rischdsch schön. Ich bin da gerne dabei und wünsche mir, dass viele Dräsdner hingehn. Denn es is ja das erschde Ferienwochenende un da sin schon viele in Urloob. Mor sollde am besdn sei Urloob am Elbhang anfang. Wär schön, mir sehn uns. An irschend ä Weinschdand wär ich beschdimmd schdehn. Halleluja! Guddmachn! Eure Kudscherin