Schöne Festdache

Horche ma droff, nuh kommd was ganz Besinnliches. Ich will heude ma ni meckern. Ich will ooch ni schimfn, sondern ganz schdille sein. Ich hab meine Rösser in Schdall geschaffd, hab den was zu fuddern gegebn und mich dazu geschdelld. Mir ham ä bissl gereded und geschmusd. Das brauchn Ferde ooch ma. Zuneigung nennd mor das. Ja, is so.
Um dä Weihnachdszeid wird mir immer klar, dass dä Menschn und dä Diere vor allm Liebe brauchn. Ja, is so. Und in Wahrheed brauchd mor das ja das ganze Jahr ieber. Bissl kuscheln, bissl näseln, bissl schdreicheln is doch so schön. Da merkd mor erschd, das mor lebd.
Und meine Diere lebn. Ich ooch. Also geh ich danach ooch zu meim Mann und mir kuschln ä bissl länger. Ja, is so.
Mir sidzn dann nebn unserm Weihnachdsboom und guggn uns an. Dä Kerzn funzeln rum, da Pyramide drehd sich, ds Räuchermännl wabeld. Ja, is so.
Das is so schön. Ich liebe das. Mir sidzn da manchma schdundn-lang und machn eefach ma nüschd.
Ma nüschd machn is so wischdsch. Ich denke dann ooch ma ni nach, sondern genieße das Muschebubu. Ja, is so.
Un dann essn mor nadürlich was. Ni viel, nur ä bissl Kardofflsalad und Würschdln. Dazu süffln mor Lühwein und dann gibds baar gleene Geschenke, ooch für dä Rösser. Ja, is so. Machn Se’s guddi un ä frohes Fesd!
Eure Kudscherin

Sie möchdn mir ma schreiben? Nu, bidde sähr an:
[email protected]